ଥାଇରଏଡ୍ ଔଷଧକୁ ଯଦି ଜଣେ ବ୍ୟକ୍ତି ଠିକ୍ ମାତ୍ରାରେ, ଠିକ୍ ପ୍ରଣାଳୀରେ ଓ ଠିକ୍ ସମୟରେ ଖାଇବ ତେବେ ଜୀବନସାରା ଖାଇଲେ ବି ତା’ର କୌଣସି ପାର୍ଶ୍ୱ ପ୍ରତିକ୍ରିୟା ଦେଖାଯାଏ ନାହିଁ।
ଥାଇରଏଡ୍ ଗ୍ରନ୍ଥି ଆମ ଶରୀରର ବେକରେ ଥାଏ। ଆମ ଶରୀରର ସବୁ କାର୍ଯ୍ୟ ଥାଇରଏଡ୍ ହରମୋନ ଉପରେ ନିର୍ଭର କରିଥାଏ। ଆମର ମୁଣ୍ଡର କେଶରୁ ନେଇକି ଗୋଡ଼ର ନଖ ପର୍ଯ୍ୟନ୍ତ ସବୁ କିଛି ନା କିଛି ମାତ୍ରାରେ ଥାଇରଏଡ୍ ହରମୋନ୍ ଉପରେ ନିର୍ଭର କରିଥାଏ। ସବୁ ବୟସର ବ୍ୟକ୍ତିଙ୍କଠାରେ ଦେଖିବାକୁ ମିଳୁଛି ଥାଇରଏଡ୍ ରୋଗ। ପୁରୁଷଙ୍କ ଅପେକ୍ଷା ମହିଳାଙ୍କଠାରେ ଏହି ରୋଗ ଅଧିକ ଦେଖିବାକୁ ମିଳିଥାଏ। ଏହା ଏକ ଅଟୋ-ଇମ୍ୟୁନ୍ ରୋଗ।
ଥାଇରଏଡ୍ ମେଡିସିନ୍ ଖାଇବା ଦ୍ୱାରା କୌଣସି ପ୍ରକାର ପାର୍ଶ୍ୱ ପ୍ରତିକ୍ରିୟା ହୁଏ ନାହିଁ। ଥାଇରଏଡ୍ ଔଷଧକୁ ଯଦି ଜଣେ ବ୍ୟକ୍ତି ଠିକ୍ ମାତ୍ରାରେ, ଠିକ୍ ପ୍ରଣାଳୀରେ ଓ ଠିକ୍ ସମୟରେ ଖାଇବ ତେବେ ଜୀବନସାରା ଖାଇଲେ ବି ତା’ର କୌଣସି ପାର୍ଶ୍ୱ ପ୍ରତିକ୍ରିୟା ଦେଖାଯାଏ ନାହିଁ।
ଥାଇରଏଡ୍ ମେଡିସିନ୍କୁ ସକାଳୁ ଉଠିବା ପରେ ଖାଲିପେଟରେ ଖାଇବା ଜରୁରୀ। ଥାଇରଏଡ୍ ଔଷଧ ଖାଇବାର ଗୋଟେ ଘଣ୍ଟା ପର୍ଯ୍ୟନ୍ତ ପାଣି ଛଡ଼ା ଅନ୍ୟ କୌଣସି ଜିନିଷ ଖାଇବା ମନା। ଯାହା ବି ଆପଣ ଖାଇବେ ଗୋଟେ ଘଣ୍ଟା ପରେ ଖାଇବେ।
ଧରାଯାଉ, ଆପଣ ଅନ୍ୟ କୌଣସି ରୋଗ ପାଇଁ କିଛି ଔଷଧ ଖାଉଛନ୍ତି ଏବଂ ଡାକ୍ତର ଆପଣଙ୍କୁ ଖାଲିପେଟରେ ଖାଇବାକୁ ପରାମର୍ଶ ଦେଇଛନ୍ତି ତେବେ ସେହି ମେଡିସିନ୍କୁ ଥାଇରଏଡ୍ ମେଡିସିନ୍ ଖାଇବାର ଗୋଟେ ଘଣ୍ଟା ପରେ ଖାଇପାରିବେ।
ଗର୍ଭବତୀ ମହିଳାମାନଙ୍କୁ ଗର୍ଭାବସ୍ଥା ସମୟରେ ସାଧାରଣତଃ ଆଇରନ୍ ଓ କ୍ୟାଲସିୟମ୍ ଔଷଧ ଖାଇବାକୁ ଦିଆଯାଇଥାଏ। ଏଭଳି କ୍ଷେତ୍ରରେ ଥାଇରଏଡ୍ ଔଷଧ ଓ କ୍ୟାଲସିୟମ୍, ଆଇରନ୍ ଔଷଧ ଖାଇବା ଭିତରେ ଅଧିକ ବ୍ୟବଧାନ ରହିବା ଦରକାର। ଥାଇରଏଡ୍ ଔଷଧ ସକାଳୁ ଖାଇବେ ଓ କ୍ୟାଲସିୟମ୍ ଓ ଆଇରନ୍ ମେଡିସିନ୍କୁ ଖରାବେଳେ ଖାଇପାରିବେ।
ଲୋକଙ୍କର ଭ୍ରାନ୍ତ ଧାରଣା ଥାଏ ଯେ ଖାଦ୍ୟପେୟ ଓ ବ୍ୟାୟାମ ନ କରିବା ଯୋଗୁଁ ଥାଇରଏଡ୍ ରୋଗ ହୋଇ ଥାଏ। କିନ୍ତୁ ଥାଇରଏଡ୍ ସମସ୍ୟାର ଖାଦ୍ୟପେୟ ଓ ବ୍ୟାୟାମ ସହ କୌଣସି ସମ୍ପର୍କ ନଥାଏ। ଏହା ଅଟୋ ଇମ୍ୟୁନ୍ ଡିଜିଜ। ଆମ ଶରୀରରେ ହରମୋନ୍ ପରିବର୍ତ୍ତନ ଯୋଗୁଁ ଥାଇରଏଡ୍ ସମସ୍ୟା ହୋଇଥାଏ।
ପୂର୍ବରୁ ଥାଇରଏଡ୍ ଆୟୋଡିନ୍ର ଅଭାବ ଯୋଗୁଁ ହେଉଥିଲା। ହେଲେ ବର୍ତ୍ତମାନ ଲୋକେ ଆୟୋଡାଇଜ୍ ଲୁଣ ଖାଉଛନ୍ତି ଯାହାଫଳରେ ଲୋକଙ୍କୁ ଲୁଣ ସାଙ୍ଗରେ ଆୟୋଡିନ୍ ମିଳିଥାଏ। ବର୍ତ୍ତମାନ ସମୟରେ ଆୟୋଡିନ୍ ଅଭାବ ନୁହେଁ ବରଂ ଅଟୋ ଇମ୍ୟୁନ୍ ଡିଜିଜ୍ କାରଣରୁ ଥାଇରଏଡ୍ ହେଉଛି। ତେଣୁ ଥାଇରଏଡ୍ ପାଇଁ ଜୀବନଶୈଳୀରେ କୌଣସି ପରିବର୍ତ୍ତନର ଆବଶ୍ୟକତା ନାହିଁ। ହେଲେ ହାଇପୋ ଥାଇରଏଡ୍ ହେଲେ ଓଜନ ବଢ଼ିଥାଏ। ତେଣୁ ସେହି ଓଜନକୁ କମେଇବାକୁ ହେଲେ ଦୈନନ୍ଦିନ ବ୍ୟାୟାମ କରିବା ଜରୁରୀ।
