ବର୍ତ୍ତମାନ ସମୟରେ ମୋଟାପଣ ବିଭିନ୍ନ ରୋଗର ମୁଖ୍ୟ କାରଣ। ମେଦବହୁଳତା ଯୋଗୁଁ ହୃଦରୋଗ, ଉଚ୍ଚ ରକ୍ତଚାପ, କୋଲେଷ୍ଟ୍ରୋଲ ବଢ଼ିଯିବା, ପାଚନ ତନ୍ତ୍ର ସମ୍ବନ୍ଧୀୟ ରୋଗ ଓ ମାନସିକ ବିଷାଦ ଭଳି ସମସ୍ୟା ଦେଖାଦିଏ।
ହାଇପୋଥାଇରଏଡଜିମ୍, ପିସିଓଡି, ଅଧିକ କ୍ୟାଲେରି ଯୁକ୍ତ ଖାଦ୍ୟ ଖାଇବା, ଫାଷ୍ଟଫୁଡ୍ ଅଧିକ ଖାଇବା, ହରମୋନ୍ ଅନିୟମିତତା, ବ୍ୟାୟାମ ନ କରିବା ଯୋଗୁଁ ମେଦବହୁଳତା ହୋଇଥାଏ।
ଅଧିକାଂଶ ବ୍ୟକ୍ତି ଶୀଘ୍ର ଓଜନ କମ୍ କରିବା ପାଇଁ ବିଭିନ୍ନ କମ୍ପାନିର ପ୍ରଡକ୍ଟ ବ୍ୟବହାର କରିଥା’ନ୍ତି। ଏହି ପ୍ରଡକ୍ଟଗୁଡ଼ିକ ଖାଇବା ପରେ ଶୀଘ୍ର ଓଜନ କମୁଛି, ହେଲେ ଏହି ଦାମିକିଆ ପ୍ରଡକ୍ଟ ଛାଡ଼ିଦେବା ପରେ ପୁଣି ଓଜନ ବଢ଼ିଯାଉଛି, ଯାହା ସ୍ୱାସ୍ଥ୍ୟ ପାଇଁ କ୍ଷତିକାରକ।
ପ୍ରାକୃତିକ ଉପାୟରେ ଓଜନ କମ୍ କରିବାର ବା ସୁସ୍ଥ ଓଜନ ବଜାୟ ରଖିବାର ଉପାୟ ହେଉଛି:
୧. ଘରେ ଓ କାର୍ଯ୍ୟାଳୟରେ ସ୍ୱାସ୍ଥ୍ୟକର ଜଳଖିଆ ରଖନ୍ତୁ
ଲୋକ ବହୁ ସମୟରେ ସୁବିଧାରେ ମିଳୁଥିବା ଖାଦ୍ୟ ଖାଇଥାଆନ୍ତି। କିନ୍ତୁ ପ୍ୟାକ୍ ହୋଇଥିବା ଖାଦ୍ୟ ଓ ମିଠା ଜିନିଷ ଏଡ଼ାଇବା ଭଲ। ତେଣୁ ଘରେ ଓ କାର୍ଯ୍ୟସ୍ଥଳରେ ସ୍ୱାସ୍ଥ୍ୟକର ଜଳଖିଆ ରଖନ୍ତୁ, ଯାହାଫଳରେ ଭୋକ ଲାଗିଲା ବେଳେ ଅତ୍ୟଧିକ ଚିନି, ଲୁଣ, ଏବଂ ତେଲ ଖାଇବା ଏଡ଼ାଇପାରିବେ। କେତେକ ସ୍ୱାସ୍ଥ୍ୟକର ଜଳଖିଆର ଉଦାହରଣ ହେଉଛି ବିଭିନ୍ନ ଡାଲି ଜାତୀୟ ଖାଦ୍ୟ ଯେପରିକି କାଜୁ, ଆଲମଣ୍ଡ, କିସ୍ମିସ୍ ଇତ୍ୟାଦି, ଫଳ, କଞ୍ଚା ଖିଆଯାଉଥିବା ପରିବା ସାଲାଡ୍ ଇତ୍ୟାଦି ଖାଇବାର ଅଭ୍ୟାସ କରନ୍ତୁ।
୨. ପ୍ରୋସେସ୍ଡ ଖାଦ୍ୟ ଖାଇବା କମ୍ କରନ୍ତୁ ଯେମିତିକି ମିଠା ଜିନିଷ, ଚେନାଚୁର, ଛଣାଛଣି ଖାଦ୍ୟ ଖାଆନ୍ତୁ ନାହିଁ।
୩. ଅଧିକ ପ୍ରୋଟିନ୍ ଖାଆନ୍ତୁ। ଅଧିକ ପ୍ରୋଟିନ୍ ଯୁକ୍ତ ଖାଦ୍ୟ ଓଜନ କମ୍ କରିବାରେ ସାହାଯ୍ୟ କରିଥାଏ। ତେଣୁ ଜଣେ ବ୍ୟକ୍ତି ଅଧିକ ଅଣ୍ଡା, ଚିକେନ୍, ମାଛ, ବିନ୍ସ, ଛେନା, ଖାଇବା ଉଚିତ। ଏହି ସମସ୍ତ ଖାଦ୍ୟ ପ୍ରୋଟିନ୍ରେ ସମୃଦ୍ଧ ହୋଇଥାଏ ଏବଂ ଅପେକ୍ଷାକୃତ ଭାବେ କମ୍ ପରିମାଣର ଫ୍ୟାଟ୍ ଧାରଣ କରେ।
୪. ଚିନି ବ୍ୟବହାରକୁ ଏଡାନ୍ତୁ। ଚିନି ଖାଇବା ଛାଡ଼ିବା ସହଜ ହୋଇନଥାଏ କିନ୍ତୁ ପ୍ରଥମେ ମିଠା ଜିନିଷ ଖାଇବା ବନ୍ଦ କରି ଏ ଦିଗରେ ଅଗ୍ରସର ହୋଇପାରିବେ।
୫. ବ୍ଲାକ୍ କଫି ପିଅନ୍ତୁ। ଚିନି ନ ପକାଇ କେବଳ ପାଣିରେ କଫି ପିଇଲେ ସ୍ୱାସ୍ଥ୍ୟକର ପ୍ରଭାବ ଲାଭ ହୋଇଥାଏ। ଏହା ଡାଏବେଟିସ୍ ଓ ଲିଭର ରୋଗର ଆଶଙ୍କା କମ୍ କରିଥାଏ।
୬. ଯଥେଷ୍ଟ ପାଣି ପିଅନ୍ତୁ। ପାଣି ପିଇବା ସୁସ୍ୱାସ୍ଥ୍ୟ ପାଇଁ ଅମୃତତୁଲ୍ୟ ହୋଇଥାଏ। ପାଣିରେ କୌଣସି କ୍ୟାଲୋରି ନଥାଏ ଏବଂ ଶରୀରକୁ ସୁସ୍ଥ ରଖେ। ତେଣୁ ଦିନସାରା ପର୍ଯ୍ୟାପ୍ତ ପରିମାଣରେ ପାଣି ପିଅନ୍ତୁ ବିଶେଷକରି ଖାଇବା ପୂର୍ବରୁ ପାଣି ପିଇଲେ ଖାଦ୍ୟ କମ୍ ଖାଇହୁଏ।
୭. ପାନୀୟରେ କ୍ୟାଲୋରୀ ସେବନ ଏଡ଼ାନ୍ତୁ। ସୋଡ଼ା, ଫଳରସ ଏବଂ ଏନର୍ଜି ଡ୍ରିଙ୍କରେ ଅଧିକ ଶର୍କରା ରହିଥାଏ ଯାହାଫଳରେ ଓଜନ ବଢ଼େ। ତେଣୁ ଓଜନ କମ୍ କରିବା କଷ୍ଟକର ହୋଇଯାଏ। ତେଣୁ ମଦ୍ୟପାନ, ବିଭିନ୍ନ ପ୍ରକାରର କଫି ଇତ୍ୟାଦି ପରିବର୍ତ୍ତେ ଲେମ୍ବୁ ପାଣି, ହର୍ବାଲ୍ ଟି ଇତ୍ୟାଦି ପିଅନ୍ତୁ।
୮. ରିଫାଇଣ୍ଡ୍ କାର୍ବୋହାଇଡ୍ରେଟ୍ ଏଡ଼ାଇବା। ଅରୁଆ ଭାତ, ମଇଦା, ପାଉଁରୁଟି, ବହୁ ପ୍ରକାରର ଶସ୍ୟ, ଚିନି, ମିଠା ଜିନିଷ ଇତ୍ୟାଦି ଓଜନ ବଢ଼ିବାର କାରଣ ହୋଇଥାଏ। ତେଣୁ ଅରୁଆ ଭାତ ବଦଳରେ ଉଷୁନା ଭାତ ଓ ଗହମ ତିଆରି ପାଉଁରୁଟି ବାଛନ୍ତୁ।
୯. ସାମୟିକ ବ୍ୟବଧାନରେ ନିୟମିତ ଉପବାସ କରନ୍ତୁ।
୧୦. କ୍ୟାଲୋରୀ ହିସାବ କରିବା ଓ ଖାଉଥିବା ଖାଦ୍ୟର ତାଲିକା କରନ୍ତୁ।
୧୧. ପ୍ରତିଥର ଖାଇବା ପରେ ଏବଂ ରାତିରେ ଶୋଇବା ପୂର୍ବରୁ ଦାନ୍ତ ଘଷନ୍ତୁ। ଏହା କେବଳ ଦାନ୍ତକୁ ପରିଷ୍କାର ରଖିବା ସହିତ ଅଯଥା ସ୍ନାକ୍ସ ଖାଇବାର ଇଛାକୁ ମଧ୍ୟ କମ୍ କରିଥାଏ।
୧୨. ଅଧିକ ଫଳ ଓ ପନିପରିବା ଖାଇବା ଶରୀରର ଓଜନ କମ୍ କରିଥାଏ।
୧୩. କାର୍ବୋହାଇଡ୍ରେଟ୍ ଯେପରିକି ଚିନି, ଭାତ, ରୁଟି ଇତ୍ୟାଦି ଅଧିକ ଖାଇବା ଏଡ଼ାନ୍ତୁ।
୧୪. ଅଧିକ ତନ୍ତୁଯୁକ୍ତ ଖାଦ୍ୟ ଖାଆନ୍ତୁ। ଏହା ଓଜନ କମ୍ କରିବା ସହ ପାଚନ ପ୍ରଣାଳୀରେ ଉନ୍ନତି ଆଣିଥାଏ।
୧୫. ନିୟମିତ ବ୍ୟାୟାମ କରିବା ଦ୍ୱାରା ଶରୀର ସୁସ୍ଥ ରହିଥାଏ। ତେଣୁ ନିୟମିତ ବ୍ୟାୟାମ କରିବାକୁ ଭୁଲନ୍ତୁ ନାହିଁ।
୧୬. ଧୀରେ ଧୀରେ ଖାଦ୍ୟକୁ ଚୋବାଇ ଚୋବାଇ ଖାଆନ୍ତୁ। ଫଳରେ ଅଧିକ ଖାଇବାକୁ ଇଛା ହୁଏ ନାହିଁ।
୧୭. ଖାଦ୍ୟରେ ଲଙ୍କା ସାମିଲ୍ କଲେ ଏହା ଓଜନ କମ୍ କରିବାରେ ସାହାଯ୍ୟ କରିଥାଏ। ଲଙ୍କାରେ ଥିବା କ୍ୟାପ୍ସାଇସିନ୍ର ଓଜନ ହ୍ରାସ ଉପରେ ଅନୁକୂଳ ପ୍ରଭାବ ରହିଥାଏ।
୧୮. ଯଥେଷ୍ଟ ଶୁଅନ୍ତୁ। ମେଦବହୁଳତା ବା ଓଜନ ବୃଦ୍ଧିର ଅନ୍ୟତମ କାରଣ ହୋଇଥାଏ ନିଦ୍ରାର ଅଭାବ। ଯଥେଷ୍ଟ ଶୋଇବା ଫଳରେ ମଧ୍ୟ ଓଜନ ନିୟନ୍ତ୍ରଣରେ ରହିଥାଏ।
୧୯. ଛୋଟ ଥାଳିରେ ଖାଦ୍ୟ ଖାଆନ୍ତୁ। ଥାଳିର ଆକାର ଛୋଟ କରିବା ଫଳରେ ଆମକୁ ଖାଦ୍ୟ ଥାଳି ଭର୍ତ୍ତି ଦିଶିଥାଏ ଓ ଆମ ମନ ଉପରେ ଏହା ପ୍ରଭାବ ପକାଇଥାଏ।
୨୦. ମଦ୍ୟପାନ, ଧୂମପାନ ଓ ନିଶାଦ୍ରବ୍ୟ ସେବନରୁ ଦୂରେଇ ରହନ୍ତୁ।
